Ugaas Rooble Qaasim Cismaan oo ka soo horjeestay shirka ay iska wadato beel qaas ah

Ugaas Rooble Qaasim Cismaan oo ka soo jeeda Gobolka Hiiraan ahna ugaaska beesha Gaaljecel oo la hadlayey idaacada radiodanan ayaa ka hadlay sida uu u arko shirka qaban qaabadiisa ay ka socoto Bariga Baladweyne.

Ugaas Rooble ayaa sheegay in shirkaas aanan loo dhameyn oo ay hal beel oo bariga Baladweyne degen, ay halkaa isugu timid, beelaha kale ee soomaaliyeed (14 beelood) ee ku dhaqan gobolkana aysan qeyb ka aheyn shirkaas.

Ugaas Rooble Qaasiim ayaa sheegay in la sugayo, reer Hiiraan ay aad u daneynayaan in la qabto shir looga tashan aayaha mustaqbalka gobolka, shirka oo la qaban doono dhowaan Insha Allaah. Balse shirkan hadda la sheegayo inuu ka socdo abaabulkiisa Bariga Baladweyne ay wadaan hal beel oo ay isbaarooyin u yaaliin halkaa cid u tagtayna aysan jirin.

Ugaaska ayaa carabka ku adkeeyey in gobolka ay degen yihiin 14 beelood, shir aanan loo dhameyn, isla mar ahaantaana aysan qeyb ku aheyn beelaha soomaaliyeed ee gobolka ku dhaqan uusan meel mari doonin, hal beel oo kaliyana aysan matali karin dhamaan shacabka ku dhaqan gobolka.

Gobolka ayaa sanadihii u danbeeyey waxaa ka socday dagaalo dad badan ay ku dhinteen, hanti badan, iyo degaano dad shacab ah ay ku noolaayeen la gubay haddana aad loo hadal hayo in gobolka uu u baahan yahay jawi cusub oo xasilooni iyo horumar, loona baahan yahay hogaan heli kara ama heysta kalsoonida dhamaan beelaha ku dhaqan gobolka Hiiraan in ay abaabulaan shir looga tashan danaha iyo mustaqbalka gobolka. Beesha Bariga Baladweyne ma heystaan kalsoonida inta badan bulshada ku dhaqan gobolka, waxayna qeyb ka ahaayeen dhibaatooyin fara badan oo loo geystay degaano iyo shacab intaba.

cowslafil.com